Ծուռ թագավորություն

Լինում է, չի լինում, մի Ծուռ թագավորություն է լինում։ Այդ թագավորությունում ամեն ինչ հակառակն է լինում՝ ամպերի փոխարեն լինում են լճեր, գետեր, քարքարոտ ճանապարհներ, իսկ ներքեւում՝ ամպեր։ Արեւը դուրս է գալիս արեւմուտքից եւ մայր մտնում արեւելքում։ Ամեն ինչ շարժվում է հակառակ ուղղությամբ՝ մարդիկ հետ-հետ են քայլում, մեքենաները հետ-հետ շարժվում, ձկները թռչում են, իսկ թռչունները՝ լողում։ Կատուն հաչում է, շունը՝ մլավում, ձին բառաչում է, կովը խրխնջում։

Մարդիկ ապրում են իրենց համար՝ չգուշակելով նույնիսկ, որ այլ կյանք գոյություն ունի։ Իսկ այլ կյանք գոյություն ուներ, որի մասին գոնե թագավորը տեղյակ էր եւ պատմել էր որդուն։ Վերջինս էլ տարիներ շարունակ ծրագրել էր, թե ինչպես է մեծանալու եւ գնալու հարեւան թագավորություն՝ տեսնելու, թե այնտեղ ինչպես է ամեն ինչ։ Վերջապես այդ ժամանակը գալիս է։

Մի օր այս Ծուռ թագավորության թագաժառանգը ճանապարհ է ընկնում, հետ-հետ քայլող իր ձիով գնում դեպի հարեւան թագավորություններից մեկը։ Շատ դժվար եւ հետաքրքիր ճանապարհ է անցնում եւ վերջապես տեղ հասնում։

Երբ տեղ է հասնում՝ զարմանքից քարանում է․ գլուխը վերեւ է բարձրացնում՝ այնտեղ ամպեր են, ոտքերի տակ է նայում՝ քարեր են, բոլորը դեպի առաջ են գնում։ Թագաժառանգը երկար ժամանակ չի կարողանում քայել։ Վերջապես ուշքի է գալիս, նստում է ձին ու հարցուփորձ անելով հասնում այդ թագավորության թագավորի մոտ։ Ում որ մոտենում է, ծիծաղում են իր ու իր հետ-հետ քայլող իր ձիու վրա։ Ի պատասխան՝ ձին բառաչում է՝ ավելի ծիծաղելի վիճակի մեջ դնելով իրեն ու իր տիրոջը։ Վերջապես գտնում է այդ թագավորության թագավորին․

-Թագավորն ապրած կենա, ես Ծուռ թագավորությունից եմ եկել։ Շատ զարմացա, երբ տեսա, թե ինչ հետաքրքիր է ձեզ մոտ ամեն ինչ․․․

Թագավորն ու Ծուռի թագաժառանգը երկար զրուցում են։ Թագավորն առաջարկում է վերադառնալ իր թագավորություն եւ առաջարկել բնակչությանը՝ միավորվել իր թագավորության հետ, իսկ ինքը խոստանում է՝ ամեն ինչ անել, որ Ծուռը դառնա այնպիսին, ինչպիսին բոլորն են։

Թագաժառանգը վերադառնում է տուն՝ ամբողջ ճանապարհին մտածելով առաջարկի մասին։ Հասնում է տուն, հորը պատմում իր տեսածի մասին։

Թագավորը որոշում է հաջորդ օրն իսկ հրաման արձակել, որ դառնում են հարեւան թագավորության մի մաս, որպեսզի իրենց մոտ էլ ամեն ինչ լինի այնպես, ինչպես ամենուր է։

Թագաժառանգը, սակայն դեմ է արտահայտվում․ նա ասում է, որ եթե բնությունն այդպես է ստեղծել ամեն բան, ուրեմն այդպես էլ պետք է լինի։ Որոշում է ամենուր լուր տարածել, որ երկրի վրա կա մի թագավորություն, որտեղ ամեն բան հակառակն է։ Լուրը անցնում է մի թագավորությունից մյուս թագավորություն, Ծուռը դառնում շատ հանրահայտ։ Ամեն տեղից մարդիկ երազում են, շտապում իրականացնել Ծուռ թագավորությունը տեսնելու հնարավորությունը։ Այն զարգանում ու ծաղկում է, դառնում մի դրախտավայր, որտեղ շտապում են գալ բոլոր զբոսաշրջիկները։

Արեգ Դուրյան

• Posted in: 2-րդ դասարն ♦ 2019-2020 ուսումնակա տարի ♦ Մեր հորինած հեքիաթները ♦ Առցանց ուսուցում ♦ Բոլոր նյութերը